ਭਾਗੋ,ਸੱਜਣ,ਬਲੀ ਕੰਧਾਰੀ
ਤਿੰਨਾਂ ਮਿਲ ਕੇ ਜੁਗਤ ਵਿਚਾਰੀ
ਨਾਨਕ ਨਾਮ ਨੂੰ ਬੇਚਣ ਚੱਲੇ
ਸਭਨਾਂ ਮਿਲ ਕੇ ਕਰੀ ਤਿਆਰੀ
ਨਾਨਕ ਗੱਡੀ ਵਿੱਚ ਚੜਾ ਕੇ
ਉਧਰੋਂ ਚੱਲ ਕੇ ਏਧਰ ਆ ਕੇ
ਪਿੰਡ ਪਿੰਡ ਨਾਨਕ ਖੂਬ ਘੁਮਾਇਆ
ਬੋਰਿਆਂ ਦੇ ਵਿੱਚ ਭਰਲੀ ਮਾਇਆ
ਨਾਨਕ ਬੰਦ ਕਾਰ ਵਿੱਚ ਕਰਿਆ
ਬੈਠਾ ਸੋਚਾਂ ਦੇ ਵਿੱਚ ਖੋਇਆ
ਸਾਦੇ ਕੱਪੜੇ ਪੈਰ ਖੜਾਵਾਂ
ਪੈਰਾਂ ਤੀਕ ਪਸੀਨਾ ਚੋਇਆ
ਜਾਪੇ ਕਿਸੇ ਸਫ਼ਰ ਤੋਂ ਮੁੜਿਆ
ਗੋਸ਼ਟ ਕੋਈ ਰਚਾ ਕੇ ਆਇਆ
ਜਾ ਮਿੱਟੀ ਨਾਲ ਮਿੱਟੀ ਹੁੰਦਾ
ਹਲ ਖੇਤਾਂ ਵਿੱਚ ਵਾਹ ਕੇ ਆਇਆ
ਗੱਡੀ ਵਿਚੋਂ ਬਾਹਰੇ ਵੇਂਹਦਾ
ਤੱਕ ਦੁਨੀਆ ਦੇ ਰੰਗ ਤਮਾਸ਼ੇ
ਨਾਨਕ ਸੋਚਾਂ ਦੇ ਵਿੱਚ ਖੋਇਆ
ਨਾਨਕ ਡਾਹਢਾ ਚਿੰਤਤ ਜਾਪੇ
ਕੌਣ ਇਹ ਨੇਂ ਚਿਮਟਿਆਂ ਵਾਲੇ
ਕਾਲੇ ਦਿਲ ਤੇ ਬੀਬੇ ਦਾਹੜੇ
ਜਾਪਣ ਕਮਲੇ ਅਤੇ ਸ਼ੁਦਾਈ
ਨਾਂ ਮੇਰੇ ਤੇ ਕਰਨ ਕਮਾਈ
ਕਿਓਂ ਫਿਰਦੇ ਇਹ ਬੰਬ ਚਲਾਉਂਦੇ
ਧੂੰਆਂ ਅੰਬਰ ਤੀਕ ਚੜਾਉਂਦੇ
ਪਵਨ ਗੁਰੂ ਤੇ ਪਿਤਾ ਹੈ ਪਾਣੀ
ਨਾਲੋਂ ਨਾਲ ਪਏ ਨੇਂ ਗਾਉਂਦੇ
ਕਿਉਂ ਇਹ ਹੱਥੀਂ ਕਿਰਤ ਨਾਂ ਕਰਦੇ
ਵੰਡ ਛਕਣ ਤੋਂ ਕਾਹਤੋਂ ਡਰਦੇ
ਮੇਰੇ ਪੈਰੋਕਾਰ ਕਹਾਉਂਦੇ
ਤਸਵੀਰਾਂ ਤੇ ਭੋਗ ਲਗਾਉਂਦੇ
ਮੈਂ ਕੋਈ ਐਸਾ ਭਰਮ ਨਾਂ ਘੜਿਆ
ਮੈਂ ਕੋਈ ਵੱਖਰਾ ਧਰਮ ਨਾਂ ਘੜਿਆ
ਮੇਰਾ ਬਾਲਾ ਤੇ ਮਰਦਾਨਾ
ਕਰ ਲਏ ਅੱਡ ਸਿਆਸਤਦਾਨਾਂ
ਉੱਚਾ ਇੱਕ ਧਮਾਕਾ ਸੁਣ ਕੇ
ਝੱਟ ਮੈਂ ਸੁੱਤਾ ਉਠ ਖਲੋਇਆ
ਨੀਂਦਰ,ਸੁਪਨਾ ਦੋਵੇਂ ਟੁੱਟੇ
ਭੱਜ ਦਰਾਂ ਦੇ ਵੱਲ ਨੂੰ ਹੋਇਆ
ਸੁਭਾਹ ਸਵੇਰੇ ਅੰਮ੍ਰਿਤ ਵੇਲੇ
ਵਾਹਵਾ ਚੀਕ ਚਿਹਾੜਾ ਪਾਇਆ
ਬੰਬ,ਪਟਾਕੇ,ਮੋਟਰ ਗੱਡੀਆਂ
ਧੂੰਆਂ ਅੰਬਰ ਤੀਕ ਚੜਾਇਆ
ਢੋਲਕੀਆਂ ਦੀ ਡਮ ਡਮ ਵਿਚੋਂ
ਉੱਚਾ ਕਿਸੇ ਜੈਕਾਰਾ ਲਾਇਆ
ਉੱਠੋ ਦਰਸ਼ਨ ਕਰਲੋ, ਪਰਲੇ
ਪਾਰੋਂ ਨਗਰ ਕੀਰਤਨ ਆਇਆ
ਕਈ ਹਜ਼ਾਰਾਂ ਦੀ ਗਿਣਤੀ ਵਿੱਚ
ਸੰਗਤ ਪੈਦਲ ਚਲਦੀ ਪਈ ਏ
ਭੀੜ ਭੜੱਕਾ ਡਾਹਢਾ ਏ ਪਰ
ਨਾਨਕ ਇਹਨਾਂ ਨਾਲ ਨਹੀਂ ਏ
ਨਾਨਕ ਸਦਾ ਸਿਦਕ ਤੇ ਖੜਿਆ
ਨਾਨਕ ਕਦੋਂ ਕਿਸੇ ਨੇਂ ਫੜਿਆ
ਨਾਨਕ ਮਰੀ ਜ਼ਮੀਰ ਨਹੀਂ ਏ
ਨਾਨਕ ਮਹਿਜ਼ ਸ਼ਰੀਰ ਨਹੀਂ ਏ
ਨਾਨਕ ਹੈ ਇੱਕ ਸੋਚ ਨਿਰਾਲੀ
ਨਾਨਕ ਮਜ਼ਲੂਮਾਂ ਦਾ ਬਾਲੀ
ਕਤਲ ਜਦੋਂ ਕੁਦਰਤ ਦਾ ਹੋਂਦਾ
ਨਾਨਕ ਓਥੇ ਕਦੋਂ ਖਲੋਂਦਾ
ਵਿਕਦਾ ਵਾਂਗ ਸਮਾਨ ਨਹੀਂ ਏ
ਨਾਨਕ ਕੋਈ ਦੁਕਾਨ ਨਹੀਂ ਏ
ਸੱਚ ਦੇ ਪਾਂਧੀ ਹੋਣਾ ਪੈਂਦਾ
ਨਾਨਕ ਆਪ ਕਮਾਉਣਾ ਪੈਂਦਾ
ਨੰਗੇ ਢਿੱਡ ਮੁਰਝਾਏ ਚਿਹਰੇ
ਛਲ ਤੇ ਕਪਟ ਨਾਂ ਨੇੜੇ ਤੇੜੇ
ਖੂਨ ਪਸੀਨਾ ਇੱਕ ਕਰਕੇ ਵੀ
ਭੁੱਖੇ ਢਿੱਡ ਹੀ ਸੌਂਵਣ ਜਿਹੜੇ
ਰੱਬ ਦੀ ਰਜ਼ਾ ਚ ਰਾਜ਼ੀ ਰਹਿੰਦੇ
ਰੁੱਖੀ, ਮਿੱਸੀ ਹੱਕ ਦੀ ਛੱਕਦੇ
ਇਸ ਬਾਰਡਰ ਦੇ ਦੋਵੇਂ ਪਾਸੇ
ਲੱਖਾਂ ਭਾਈ ਲਾਲੋ ਵਸਦੇ
ਕਈ ਇਹਨਾਂ ਚੋਂ ਤਿਲਕ ਲਗਾਉਂਦੇ
ਕਈ ਸਿਰ ਚਿੱਟੀ ਟੋਪੀ ਪਾਉਂਦੇ
ਕੁਝ ਨਾਨਕ ਦਾ ਨਾਮ ਨਾਂ ਜਾਨਣ
ਕੁੱਝ ਨਾਨਕ ਨੂੰ ਪੀਰ ਬੁਲਾਉਂਦੇ
ਜੋ ਇਸ ਭੀੜੋਂ ਦੂਰ ਬੜੇ ਨੇਂ
ਲੇਬਰ ਚੌਂਕਾਂ ਵਿੱਚ ਖੜੇ ਨੇਂ
ਇਹਨਾਂ ਵੱਲ ਨੂੰ ਤੱਕ ਹਸਦਾ ਹੈ
ਨਾਨਕ ਇਹਨਾਂ ਵਿੱਚ ਵਸਦਾ ਹੈ
ਨਾਨਕ ਇਹਨਾਂ ਵਿੱਚ ਵਸਦਾ ਹੈ
ਸੁਖਵਿੰਦਰ ਸੁੱਖ
ਭੈਣੀ ਮਹਿਰਾਜ
6/11/19
No comments:
Post a Comment