Phullan Di Varkha - Manmohan Kaur

ਫ਼ੁੱਲਾਂ ਦੀ ਵਰਖਾ ਕਰ ਦਿਉ ਸਖ਼ੀਉ,
ਮੇਰੀ ਸੁਫ਼ਨਿਆ ਵਾਲੀ ਰਾਤ...
ਜਦ ਚਾਨਣ ਦਾ ਭਰਿਆ ਸਾਗਰ,
ਮੈਂ ਬੁਕਾਂ ਦੇ ਨਾਲ ਮੁਕਾਇਆ,
ਜਦੋਂ ਸ਼ਰਾਬੀ ਬੁਲਿਆਂ ਆ ਕੇ,
ਮੇਰਾ ਅੰਗ ਅੰਗ ਨਸ਼ਿਆਇਆ,
ਜਦ ਭੌਰਾਂ ਨੇ ਅੱਧੀ ਰਾਤੀਂ,
ਕਲੀਆਂ ਕੋਲੋਂ ਘੁੰਡ ਚੁਕਾਇਆ ,
ਉਸ ਰਾਤ ਦੀ ਮੈਂ ਗੱਲ ਕਰਾਂ,
ਉਸ ਰਾਤ ਦੀ ਮੈ ਪਾਵਾਂ ਬਾਤ !!!
ਫ਼ੁੱਲਾਂ ਦੀ ਵਰਖਾ ਕਰ ਦਿਉ ਸਖ਼ੀਉ,
ਮੇਰੀ ਸੁਫ਼ਨਿਆ ਵਾਲੀ ਰਾਤ!!!
ਉਸ ਰਾਤੀਂ ਚਾਨਣ ਦੇ ਰੱਥ ਨੂੰ,
ਮਿਰਗਾਂ ਦੇ ਪੑਛਾਵੇਂ ਜੋੜੇ,
ਰਿਸ਼ਮਾਂ ਨੇ ਹੱਥ ਫ਼ੜੀਆਂ ਵਾਂਗਾਂ,
ਬਦਲੀ ਨੇ ਆ ਇੱਤਰ ਨਚੋੜੇ,
ਧੂੜਾਂ ਕੇਸਰ ਬਣ ਬਣ ਉੜੀਆਂ,
ਨਾਅਫ਼ੇ ਬਣ ਗਏ ਰਾਹ ਦੇ ਰੋੜੇ,
ਉਸ ਰੱਥ ਵਿੱਚ ਮੈਂ ਬੈਠੀ,
ਉਸ ਰਾਤ ਮੈਂ ਤੁਰੀ ਬਰਾਤ ,
ਫ਼ੁੱਲਾਂ ਦੀ ਵਰਖਾ ਕਰ ਦਿਉ ਸਖ਼ੀਉ,
ਮੇਰੀ ਸੁਫ਼ਨਿਆ ਵਾਲੀ ਰਾਤ!!!
ਉਸ ਰਾਤ ਸੱਧਰਾਂ ਦੇ ਪੱਲੇ,
ਖੁਲ ਖੁਲ ਗਏ ਰਾਹ ਵਿੱਚ ਸਾਰੇ,
ਬਾਹਵਾਂ ਚੋਂ ਅੰਗੜਾਈ ਨੁਚੜੀਂ,
ਅੱਖਾਂ ਵਿੱਚੋਂ ਸੁਰਗ ਨਜ਼ਾਰੇ,
ਉਸ ਰਾਤ ਮੈਂ ਨਿਰੀ ਸੁਗੰਧੀ,
ਉਸ ਰਾਤ ਫ਼ੁਲ ਮੈਂਥੋਂ ਭਾਰੇ,
ਨੂਰੋਂ ਨੂਰ ਹੋਇਆ ਜਗ ਸਾਰਾ ,
ਜਦ ਮੈਂ ਘੁੰਡ ਚੋਂ ਪਾਈ ਝਾਤ!!!
ਫ਼ੁੱਲਾਂ ਦੀ ਵਰਖਾ ਕਰ ਦਿਉ ਸਖ਼ੀਉ,
ਮੇਰੀ ਸੁਫ਼ਨਿਆ ਵਾਲੀ ਰਾਤ!!!
Manmohan Kaur