ਬਾਪੂ ਨੇ ਕਿਹਾ ਸੀ ;
ਸਾਡੇ ਕੋਲ
ਉਦਾਸ ਹੋਣ ਦਾ
ਸਮਾਂ ਨਹੀਂ ,
ਸਾਡੇ ਕੋਲ
ਨਿਰਾਸ਼ ਹੋਣ ਦੀ
ਵਿਹਲ ਨਹੀਂ ।
ਨਹੀਂ ਤਾਂ
ਅਸੀਂ ਕਿਹੜਾ
ਪੱਥਰਾਹਟ ਹਾਂ !
ਅਸੀਂ ਕਿਹੜਾ
ਪਠਾਰ ਹਾਂ !
ਸਾਡੇ ਰੋਮ ਰੋਮ 'ਚ ਵੀ
ਮਿੱਠੇ ਚਸ਼ਮਿਆਂ ਦੀ
ਖਾਰੀ ਸਿੱਲ੍ਹ ਹੈ ,
ਸਾਡੀ ਹਿੱਕ 'ਚ ਵੀ
ਤਲਿਸਮੀ ਝੀਲਾਂ ਦੀਆਂ
ਮਰਮਰੀ ਕੂੰਝਾਂ
ਉੱਡਦੀਆਂ ਹਨ !
ਪਰ ਅਸੀਂ
ਮੋਰਖੰਭ ਨਾਲ
ਤਲਵਾਰ ਤੇ
ਕਵਿਤਾ ਨਹੀਂ ਲਿਖਦੇ !
ਬਾਪੂ ਨੇ ਕਿਹਾ ਸੀ ;
ਦਾਨਾਬਾਦ ਤੀਕ
ਰਾਹ 'ਚ ਆਉਣ ਵਾਲਾ
ਹਰ ਜੰਡ ਛਾਂਗਦੇ ਜਾਇਓ
ਇੰਨਾਂ ਦੀ ਛਾਂਅ
ਛਲਾਵਾ ਹੁੰਦੀ ਹੈ ਪੁੱਤਰੋ !
ਨਹੀਂ ਤਾਂ
ਸਾਡੇ ਕਿਹੜਾ
ਸੰਘ 'ਚ ਅੜਦੀ ਸੀ
ਪਿੱਛੇ ਪਿੱਛੇ ਆਉਂਦੀ
ਗੁੜ ਘਿਓ ਦੀ ਚੂਰੀ !
ਬੱਸ
ਬਾਪੂ ਨੇ ਕਿਹਾ ਸੀ ;
ਪੁੱਤ
ਨਗਾਰਿਆਂ ਦੀ ਰੁੱਤੇ
ਵੰਝਲੀ
ਉੰਝ ਹੀ ਬੁਰੀ ਲਗਦੀ ਹੈ
ਤੇ ਅਸੀਂ
ਬਾਸਾਂ ਦੇ ਜੰਗਲ 'ਚੋਂ
ਡਾਗਾਂ ਛਾਂਗ ਲਈਆਂ !
#ਅਮਰਦੀਪ_ਸਿੰਘ_ਗਿੱਲ
No comments:
Post a Comment