ਗ਼ਜ਼ਲ - ਹਰਜਿੰਦਰ ਬੱਲ

ਤੇਰੇ ਕੋਲ਼ੋਂ ਜੇ ਨਾ ਨਿਭਾਈ ਗਈ ਤਾਂ ?

ਤੇਰੀ ਯਾਰੀ ਹੋ ਗਈ ਜੇ ਆਈ ਗਈ ਤਾਂ ?

ਬੜੀ ਔਖੀ ਗਾਉਣੀ ਗ਼ਜ਼ਲ ਜ਼ਿੰਦਗੀ ਦੀ,

ਕਰਾਂਗਾ ਮੈਂ ਕੋਸ਼ਿਸ਼ ਜੇ ਗਾਈ ਗਈ ਤਾਂ।

ਮੈਂ ਰੱਖਾਂਗਾ ਦਿਲ ਵਿਚ ਲੁਕਾ ਪੀੜ ਦਿਲ ਦੀ,

ਮਗਰ ਜੇ ਨਾ ਮੈਥੋਂ ਲੁਕਾਈ ਗਈ ਤਾਂ?

ਇਹ ਵਾਅਦਾ ਹੈ ਮੇਰਾ ਕਿ ਦਾਇਰੇ ’ਚ ਰਹਿ ਕੇ,

ਨਿਭਾਵਾਂਗਾ ਜੇਕਰ ਨਿਭਾਈ ਗਈ ਤਾਂ।

ਚੜ੍ਹੇ ਗ਼ਮ ਦੇ ਬੱਦਲ਼ ਨਹੀਂ ਖ਼ੈਰ ਰਹਿਣੀ,

ਝੜੀ ਜੇ ਨਾ ਨੈਣੀਂ ਲੁਕਾਈ ਗਈ ਤਾਂ?

ਤੂੰ ਕਹਿਨੈ ਤਾਂ ਸੁਣ ਵਗਦੇ ਅਸ਼ਕਾਂ ਦੀ ਗਾਥਾ,

ਮਗਰ ਜੇ ਨਾ ਮੈਥੋਂ ਸੁਣਾਈ ਗਈ ਤਾਂ?

ਝਮੇਲੇ ਨੇ ਪਹਿਲਾਂ ਹੀ ਮੈਨੂੰ ਬਥੇਰੇ,

ਪੁਗਾਵਾਂਗਾ ਜੇਕਰ ਪੁਗਾਈ ਗਈ ਤਾਂ।