ਹੱਜ ਕੀਤਾ ਪਰ ਰੱਬ ਨਾ ਮਿਲਿਆ
ਗੰਗਾ ਦੇ ਵਿਚ ਪਾਪ ਨਾ ਧੁਲਿਆ
ਮਿੱਟੀ ਵਿਚ ਮਿੱਟੀ ਹੋ ਰੁਲਿਆ
ਭੇਤ ਸੱਜਣ ਦਾ ਫਿਰ ਨਾ ਖੁੱਲਿਆ
ਆਖ਼ਿਰ ਨੂੰ ਸਭ ਕੁਝ ਹੀ ਭੁੱਲਿਆ
ਬੈਠੇ ਹਿੰਮਤ ਹਾਰ ਵੇ ਸਾਂਈ
ਰੋਵਾਂ ਜ਼ਾਰੋ ਜ਼ਾਰ ਵੇ ਸਾਂਈ
ਆ ਮਿਲ ਹੁਣ ਇਕ ਵਾਰ ਵੇ ਸਾਂਈ
ਜਾਂ ਫਿਰ ਥਾਈਂ ਮਾਰ ਵੇ ਸਾਂਈ .....
ਫੱਕਰਾਂ ਵਾਂਗੂੰ ਦਰ ਦਰ ਫਿਰਦੇ
ਖੈਰ ਕੋਈ ਨਾ ਪਾਵੇ
ਅਲਾਹ ਹੂ ਦੀ ਹੂਕ ਲਗਾਵਾਂ
ਤੂੰ ਨਜ਼ਰੀ ਨਾ ਆਵੇ
ਕਿੱਥੇ ਲੁਕ ਕੇ ਬੈਠਾਂ ਏਂ ਦੱਸ
ਕਰਕੇ ਬੰਦ ਦਵਾਰ ਵੇ ਸਾਂਈ
ਸਿਸਕ ਸਿਸਕ ਕੇ ਦਮ ਵੀ ਸੁੱਕੇ
ਵਗ ਵਗ ਹੰਝੂ ਮੁੱਕੇ
ਤੱਕਦੇ ਤੱਕਦੇ ਰਾਹਾਂ ਥੱਕੀਆਂ
ਪਰ ਸੱਜਣ ਨਾ ਢੁੱਕੇ
ਮੁੱਕਣ ਉੱਤੇ ਆਈ ਜਿੰਦੜੀ
ਹੋਇਆ ਨਾ ਦੀਦਾਰ ਵੇ ਸਾਂਈ
ਹਰ ਧੜਕਨ ਤੇਰਾ ਨਾਂ ਪਈ ਲੈਂਦੀ
ਸਾਂਈ ਸਾਂਈ ਕਹਿੰਦੀ
ਸਾਥੋਂ ਚੰਗੀ ਪੌਣ ਜੋ ਹਰ ਪਲ
ਤੇਰੇ ਅੰਗ ਸੰਗ ਰਹਿੰਦੀ
ਏਸ ਹਵਾ ਚੋਂ ਖੁਸ਼ਬੂ ਤੇਰੀ
ਛੇੜੇ ਤਾਨੇ ਮਾਰ ਵੇ ਸਾਂਈ
ਪੁਜ ਹੀ ਜਾਣਾ ਤੇਰੇ ਤਕ ਮੈਂ
ਜਾ ਆਜ਼ਮਾ ਲੈ ਮੈਨੂੰ
ਚੱਲਦੇ ਤੇਰੇ ਮੁੱਕਦੇ ਤੇਰੇ
ਸਾਹ ਮੁਬਾਰਕ ਤੈਨੂੰ
ਰੂਹ ਸਮਾਉਣੀ ਆਖ਼ਿਰ ਰੂਹ ਵਿਚ
ਲੰਘ ਜਾਣਾ ਏ ਪਾਰ ਵੇ ਸਾਂਈ ....
SONIA BHARTI
Nice
ReplyDelete