ਚੇਤੇ ਹੁਣ ਆਉਂਦਾ , ਉਹ ਸਮਾਂ ਰੱਜ ਕੇ
ਪਿੰਡ ਅਸੀਂ ਗਏ ਬੜਾ ਗੱਜ ਵੱਜ ਕੇ
ਤਾਏ ਨੇ ਪਿਆਰ ਜਤਾਇਆ ਸੀ ਬੜਾ
ਆਨੰਦ ਓਥੇ ਜਾ ਕੇ ਆਇਆ ਸੀ ਬੜਾ
ਛੁੱਟੀਆਂ ਹੋਈਆਂ, ਅਸੀਂ ਖੁਸ਼ ਰੱਜ ਕੇ
ਕੱਚਾ ਘਰ ਵੇਖਦੀ, ਮੈਂ ਭੱਜ ਭੱਜ ਕੇ
ਨੱਚ ਨੱਚ ਭਰਥੂ ਪਾਇਆ ਸੀ ਬੜਾ
ਆਨੰਦ ਓਥੇ ਜਾ ਕੇ ਆਇਆ ਸੀ ਬੜਾ
ਖੋਲਿਆ ਸੀ ਕਮਰਾ, ਮੈਂ ਆਪ ਭੱਜ ਕੇ
ਉਡੀਆਂ ਕੁਕੜੀਆਂ, ਮੈਨੂੰ ਵੱਜ ਵੱਜ ਕੇ
ਨਿਕਲੀਆਂ ਚੀਕਾਂ, ਰੁਆਇਆ ਸੀ ਬੜਾ
ਆਨੰਦ ਓਥੇ ਜਾ ਕੇ ਆਇਆ ਸੀ ਬੜਾ
ਸਾਰੇ ਆਂਢੀ ਗੁਆਂਢੀ, ਆਪ ਆਣ ਮਿਲਦੇ
ਖੁਸ਼ੀ ਗਮੀ ਹੁੰਦੀ, ਸਾਰੇ ਆਣ ਰਲਦੇ
ਸਾਦਾ ਜੀਵਨ ਜਾਚ, ਭਾਇਆ ਸੀ ਬੜਾ
ਆਨੰਦ ਓਥੇ ਜਾ ਕੇ ਆਇਆ ਸੀ ਬੜਾ
ਰੱਬ ਜਿਹੇ ਲੋਕ, ਪਿੰਡ ਵਿੱਚ ਵਸਦੇ
ਕਰਨ ਮਸ਼ਕਤਾਂ , ਤੇ ਰਹਿਣ ਹਸਦੇ
ਭਾਈਚਾਰਾ ਪਿੰਡ ਦਾ ਲੁਭਾਇਆ ਸੀ ਬੜਾ
ਆਨੰਦ ਓਥੇ ਜਾ ਕੇ ਆਇਆ ਸੀ ਬੜਾ।
#ਪ੍ਰੀਤਮਾ
---------------------
No comments:
Post a Comment