ਬਿਮਾਰੀ ਹੋਰ ਹੈ ਮੈਨੂੰ, ਸਿਆਣੇ ਹੋਰ ਦੱਸਦੇ ਨੇ,
ਇਹ ਪੰਡਤ ਹੋਰ ਦੱਸਦੇ ਨੇ, ਮੁਲਾਣੇ ਹੋਰ ਦੱਸਦੇ ਨੇ।
ਜਦੋਂ ਪੁੱਛਦਾ ਤਬੀਬਾਂ ਨੂੰ, ਮੈਂ ਮੁੱਲ ਦਿਲ ਦੀ ਦਵਾਈ ਦਾ,
ਨਵੇਂ ਕੁਝ ਹੋਰ ਦੱਸਦੇ ਨੇ, ਪੁਰਾਣੇ ਹੋਰ ਦੱਸਦੇ ਨੇ।
ਅਜੇ ਮੇਰੇ ਮਸੀਹਾ ਨੂੰ, ਮਹੂਰਤ ਦਿਨ ਨਹੀਂ ਲੱਭਦਾ,
ਪੁਆਂਦੀ ਹੋਰ ਦੱਸਦੇ ਨੇ, ਸਰਾਹਣੇ ਹੋਰ ਦੱਸਦੇ ਨੇ।
ਮੇਰੀ ਜ਼ਿੰਦਗੀ ਬਚਾਵਣ ਲਈ, ਕਈਆਂ ਨੇ ਹਾਂ ਜਦੋ' ਕੀਤੀ,
ਉਹ ਟਿਕਦੇ ਹੋਰ ਕਿਧਰੇ ਨੇ, ਟਿਕਾਣੇ ਹੋਰ ਦੱਸਦੇ ਨੇ।
ਮੇਰੀ ਕਿਸਮਤ ਦੀ ਕਿਸ਼ਤੀ ਨੇ, ਖ਼ਬਰ ਨਹੀਂ ਕਿੱਧਰ ਨੂੰ ਜਾਣਾ,
ਇਹ ਸਾਗਰ ਹੋਰ ਦੱਸਦੇ ਨੇ, ਮੁਹਾਣੇ ਹੋਰ ਦੱਸਦੇ ਨੇ।
ਕਰੇ ਇਤਬਾਰ ਕੀ 'ਆਲਮ', ਇਹਨਾਂ ਵਾਅਦੇ ਬਿਆਨਾਂ ਦਾ,
ਕਚਹਿਰੀ ਹੋਰ ਦੱਸਦੇ ਨੇ, ਤੇ ਥਾਣੇ ਹੋਰ ਦੱਸਦੇ ਨੇ।
~ ਗੁਰਦਾਸ ਰਾਮ ਆਲਮ
No comments:
Post a Comment