ਹੱਦੋਂ ਵੱਧ ਮਿਹਨਤੀ ਕਿਰਤੀ ਫਿਰ ਵੀ ਤਨ 'ਤੇ ਲ਼ੀਰਾਂ ਨੇ ।
ਕਦ ਤੱਕ ਇਵੇਂ ਦਿਨ ਲੰਘਾਉਣੇ ਰੱਬਾ, ਕਾਮੇ ਵੀਰਾਂ ਨੇ ।
ਰੁੱਖੀ- ਮਿੱਸੀ ਖਾ ਕੇ ਦਾਤਾ ਤੇਰਾ ਸ਼ੁਕਰ ਮਨਾਉਂਦੇ ਉਹ,
ਦੱਸ ਉਨ੍ਹਾਂ ਦੇ ਹਿੱਸੇ ਦੀਆਂ ਕਿੱਥੇ ਗਈਆਂ ਖੀਰਾਂ ਨੇ ।
ਹਰ ਥਾਂ ਵੇਖਾਂ ਭਾਗੋ ਵਰਗੇ ਪੀਂਦੇ ਖੂਨ ਗਰੀਬਾਂ ਦਾ,
ਹੱਕ ਕਿਸੇ ਦਾ ਖਾਣਾ ਮਾੜਾ ਕਰਦੇ ਇਹ ਤਕਰੀਰਾਂ ਨੇ ।
ਚੁੱਲ੍ਹਾ ਮਘਦਾ ਰੱਖਣ ਖਾਤਰ ਨਿੱਤ ਦਿਹਾੜੀ ਲਾਉਂਦੇ ਜੋ,
ਧੁੰਦ ਤਪਸ਼ ਵੀ ਝੱਲੇ ਉਨ੍ਹਾਂ ਮਿਹਨਤਕਸ਼ ਸਰੀਰਾਂ ਨੇ ।
ਖੂਨ ਪਸੀਨਾ ਇਕ ਕਰਦੀ ਦੀ ਕਰਦਾ ਹਾਂ ਜਦ ਗੱਲ ਕਿਤੇ,
ਬਹੁਤੇ ਅਕਸਰ ਪੱਲਾ ਝਾੜਨ ਕਹਿ ਕੇ ਇਹ ਤਕਦੀਰਾਂ ਨੇ ।
ਕੱਚੇ ਕੋਠੇ ਚੋਂਦੀਆਂ ਛੱਤਾਂ ਰੈਣ - ਬਸੇਰੇ ਕਈਆਂ ਦੇ,
ਠੁੰਮਣੇ ਦੇ ਕੇ ਖੜ੍ਹੀਆਂ ਰੱਖੀਆਂ ਕਈਆਂ ਨੇ ਛਤੀਰਾਂ ਨੇ ।
ਅਰਜ਼ ਨਿਸ਼ਾਨ ਕਰੇ ਰੱਬਾ ਕਰ ਹਾਲਤ ਸਹੀ ਗਰੀਬਾਂ ਦੀ,
ਕਿਰਤ ਕਰਦਿਆਂ ਹੱਥਾਂ ਉੱਤੋਂ ਜਾਂਦੀਆਂ ਮਿਟ ਲਕੀਰਾਂ ਨੇ ।
ਨਿਸ਼ਾਨ ਸਿੰਘ
ਪਿੰਡ ਤੇ ਡਾਕ : ਜੌੜਾ ਸਿੰਘਾ
ਜ਼ਿਲ੍ਹਾ : ਗੁਰਦਾਸਪੁਰ
ਫੋਨ : 9646540249
No comments:
Post a Comment