ਕੁੜੀਆਂ ਪੇਕੇ ਆਈਆਂ ਵੇਖੋ ਸਾਵਣ - Balwinder Kaur Sargi

ਕੁੜੀਆਂ ਪੇਕੇ ਆਈਆਂ ਵੇਖੋ ਸਾਵਣ 'ਚ,
ਪੀਂਘਾਂ ਖੂਬ ਚੜਾਈਆਂ ਵੇਖੋ ਸਾਵਣ 'ਚ।
ਮਾਵਾਂ ਧੀਆਂ ਰਲ ਬੈਠੇ ਸਭ ਭੈਣ ਭਰਾ,
ਰੌਣਕਾ ਜਿਨਾਂ ਲਾਈਆਂ ਵੇਖੋ ਸਾਵਣ 'ਚ।
ਖੀਰਾ ਪੂੜੇ ਪੱਕੇ ਗਿੱਧਾ ਰਲ ਪਾਇਆ,
ਨਣਦਾਂ ਤੇ ਭਰਜਾਈਆਂ ਵੇਖੋ ਸਾਵਣ 'ਚ।
ਕੋਇਲਾ ਗਾਏ ਗੀਤ ਤੇ ਡੱਡੂਆਂ ਦਾ,
ਰੌਲਾ,
ਮੋਰਾਂ ਪੈਲਾ ਪਾਈਆਂ ਵੇਖੋ ਸਾਵਣ'ਚ।
ਪੱਤਿਆਂ ਖੜ-ਖੜ ਲਾਈ ਟਾਹਣੀਆਂ ਝੂਮਦੀਆਂ,
ਘੋਰ ਘਟਾਵਾਂ ਛਾਈਆਂ ਵੇਖੋ ਸਾਵਣ'ਚ।
ਪੀਂਘ ਪੈਂ ਗਈ ਸਤਰੰਗੀ ਅਸਮਾਨ ਉੱਤੇ।
ਕੁੜੀਆਂ ਤੀਆਂ ਲਾਈਆਂ ਵੇਖੋ ਸਾਵਣ 'ਚ।
ਬਲਵਿੰਦਰ 'ਸਰਘੀ' ਆਓ ਕਿੱਕਲੀ ਰਲ ਪਾਈਏ,
ਦੂਰ ਹੋਣ ਤਨਹਾਈਆਂ ਵੇਖੋ ਸਾਵਣ'ਚ।