ਮੰਜੇ ਛਡ ਕੇ ਕੁਰਸੀ ਤੇ ਪੁੱਤ ਬਹਿਣ ਲੱਗੇ ਨੇ
ਅਪਣੀ ਹੀ ਮਾਂ ਨੂੰ ਸੁਦਾਇਣ ਕਹਿਣ ਲੱਗੇ ਨੇ
ਪੰਜਾਬੀ ਜੁਬਾਨ ਨੂੰ ਕਹਿਣ ਹੁਣ ਪੇਂਡੂ ਬੋਲੀ ਹੈ
ਜਦੋਂ ਦੇ ਉਹ ਕੋਠੀ ਪਾਕੇ ਸਹਿਰ ਰਹਿਣ ਲੱਗੇ ਨੇ
ਭਾਸਣ ਅੰਗਰੇਜੀ ਵਿਚ ਦੇਵੇ ਮੁੱਖ ਮੰਤਰੀ
ਸਮਝੋਂ ਬਗੈਰ ਟੀ ਵੀ ਵੱਲ ਨੈਣ ਲੱਗੇ ਨੇ
ਚਮਕੂਗਾ ਕਿੱਦਾਂ ਦੱਸੋ ਸੂਰਜ ਪੰਜਾਬੀ ਵਾਲਾ
ਘਰ ਵਿਚ ਅਪਣੇ ਹੀ ਸੌ ਗ੍ਰਿਹਣ ਲੱਗੇ ਨੇ
ਉੱਡਣ ਲਈ ਆਜ਼ਾਦ ਸਨ ਖੁੱਲਾ ਸੀ ਅਕਾਸ
ਚੂਰੀ ਪਿੱਛੇ ਤੋਤੇ ਵੇਖ ਗੁਲਾਮੀ ਸਹਿਣ ਲਗੇ ਨੇੇ
ਹੁਣ ਪਿੰਡਾ ਵਿਚ ਸਾਂਭਣਗੇ ਭਈਏ ਪੰਜਾਬੀ ਬੋਲੀ
ਪੰਜਾਬੀ ਬੱਚੇ ਤਾਂ ਕਾਨਵੈਂਟੀਂ ਬਹਿਣ ਲਗੇ ਨੇ
ਸੂਕਦਾ ਦਰਿਆ ਵੰਡ ਨਹਿਰਾਂ ਦੀ ਨੇ ਖਾ ਲਿਆ
ਹੁਣ ਨਹਿਰਾਂ ਦੇ ਪਾਣੀਆਂ ਚੋਂ ਖਾਲ ਵਹਿਣ ਲੱਗੇ ਨੇ
ਮਗਜ ਖਪਾ ਨਾ ਅੈਵੇਂ ਕਾਗਜਾਂ ਦੇ ਨਾਲ ਸੰਧੂ
ਤੇਰੇ ਕਿਹੜੇ ਮੰਜੇ ਲਾਲ ਕਿਲੇ ਡਹਿਣ ਲੱਗੇ ਨੇ
/////////////// ਬਲਜੀਤ ਸੰਧੂ
No comments:
Post a Comment