ਕੋੲੀ ਜਰ ਲੈਂਦਾ ਕੋਈ ਲੜ ਲੈਂਦਾ
ਕੋਈ ਭੁੱਜ ਲੈਂਦਾ ਕੋਈ ਸੜ ਲੈਂਦਾ
ਕੋਈ ਮਜਬੂਰੀ ਵਿੱਚ ਚੁੱਪ ਰਹਿੰਦਾ
ਕੋਈ ਡਰਦਾ ਹੀ ਕੁਝ ਨਾ ਕਹਿੰਦਾ
ਸਭ ਆਪਣੇ ਆਪਣੇ ਹਿੱਸੇ ਦਾ
ਗੁੱਸਾ ਤਾਂ ਭਾਵੇਂ ਕਰਦੇ ਨੇ
ਕੁਝ ਲੋਕ ਮਗਰ ਜਜ਼ਬਾਤਾਂ ਨੂੰ
ਗੀਤਾਂ ਦੇ ਨਾਂਵੇਂ ਕਰਦੇ ਨੇ
ਕੋਈ ਇਨਕਲਾਬ ਨੂੰ ਲਿਖਦਾ ਏ
ਕੋਈ ਗੀਤ ਹਿਜਰ ਵਿਚ ਭਖਦਾ ਏ
ਕੋਈ ਪੀੜਾਂ ਤੇ ਮਜਬੂਰੀ ਨੂੰ
ਦੁਨੀਆਂ ਸਿਰਨਾਵੇਂ ਕਰਦੇ ਨੇ
ਕੁਝ ਲੋਕ ਮਗਰ ਜਜ਼ਬਾਤਾਂ ਨੂੰ
ਗੀਤਾਂ ਦੇ ਨਾਂਵੇਂ ਕਰਦੇ ਨੇ
ਹਥਿਆਰ ਪਿਆ ਕੋਈ ਚੁੱਕਦਾ
ਕੋਈ ਵੈਰੀ ਦੁਸ਼ਮਣ ਨੂੰ ਟੁੱਕਦਾ
ਪਰ ਹਰਫ਼ਾਂ ਵਿੱਚ ਹੀ ਸ਼ੇਰ ਬਣਨ
ਉਂਝ ਅਸਲ ਚ ਭਾਵੇਂ ਡਰਦੇ ਨੇ
ਕੁਝ ਲੋਕ ਮਗਰ ਜਜ਼ਬਾਤਾਂ ਨੂੰ
ਗੀਤਾਂ ਦੇ ਨਾਵੇਂ ਕਰਦੇ ਨੇ
ਕੋਈ ਰੋ ਰੋ ਆਪਣਾ ਗਮ ਦੱਸਦਾ
ਕੋਈ ਵੈਰ ਵਿਰੋਧੀ ਤੇ ਹੱਸਦਾ
ਆਪਣੇ ਸੀਨੇ ਦਾ ਗੁਭ ਗਲਾਟ
ਕਾਗਜ਼ ਦੀ ਹਿੱਕ ਤੇ ਧਰਦੇ ਨੇ
ਕੁਝ ਲੋਕ ਮਗਰ ਜਜ਼ਬਾਤਾਂ ਨੂੰ
ਗੀਤਾਂ ਦੇ ਨਾਵੇਂ ਕਰਦੇ ਨੇ
ਕੋਈ ਕਹੇ ਤੂਫਾਨ ਤੇ ਅੱਗ ਕਹੇ
ਕੋਈ ਆਪਣੀ ਹਦ ਤੋਂ ਵੱਧ ਕਹੇ
ਪਰ ਹਰਫ਼ਾਂ ਨਾਲ ਨਿਆਂ ਤਾਂ ਬਸ
ਕੁਝ ਟਾਂਵੇਂ ਟਾਂਵੇਂ ਕਰਦੇ ਨੇ
ਕੁਝ ਲੋਕ ਮਗਰ ਜਜ਼ਬਾਤਾਂ ਨੂੰ
ਗੀਤਾਂ ਦੇ ਨਾਵੇਂ ਕਰਦੇ ਨੇ
ਨਾ ਗੀਤਾਂ ਨੂੰ ਬਦਨਾਮ ਕਰੋ
ਕੁਝ ਵਧੀਆ ਆਪਣੇ ਨਾਮ ਕਰੋ
ਲਿਖਤਾਂ ਰਾਹੀਂ ਸੱਚੇ ਲੇਖਕ
ਆਪਣੇ ਪਰਛਾਵੇਂ ਕਰਦੇ ਨੇ
ਕੁਝ ਲੋਕ ਮਗਰ ਜਜ਼ਬਾਤਾਂ ਨੂੰ
ਗੀਤਾਂ ਦੇ ਨਾਵੇਂ ਕਰਦੇ ਨੇ.....
No comments:
Post a Comment