ਨਜ਼ਮ - ਤਰਨਜੀਤ ਸਿੰਘ

ਬਣ ਜੱਲਾਦ, ਬਿਨਾਂ ਦੋਸ਼ੋਂ ਹੀ, ਜੀਆ ਜੰਤ ਮੁਕਾ ਦਿੱਤੇ l

ਲਾ ਕੇ ਅੱਗਾਂ ਖ਼ੇਤ ਉਨ੍ਹਾਂ ਨੇ ਸਿਵਿਆਂ ਵਾਂਗ ਬਣਾ ਦਿੱਤੇ l

ਲਾ ਤਾਂ ਦਿੱਤੀ ਸੀ ਸਹਿਜੇ ਹੀ, ਅੱਗ ਬੁਝਾ ਨਾ ਹੋਈ ਪਰ,

ਨਾਲਦਿਆਂ ਦੇ ਸੁਪਨੇ ਆਸਾਂ, ਵੀ ਚੁੱਲ੍ਹੇ ਵਿਚ ਲਾ ਦਿੱਤੇ l

ਪਾਣੀ ਦੂਸ਼ਿਤ, 'ਵਾ ਜ਼ਹਿਰੀਲੀ, ਅੰਬਰ ਘਸਮੈਲਾ ਦਿਸਦਾ,

ਆਦਮ ਜਾਏ ਨੇ ਦੇਖੋ, ਸਭ ਤਾਣੇ ਨੇ ਉਲਝਾ ਦਿੱਤੇ l

ਸੜਕਾਂ, ਰਾਹਾਂ ਉੱਤੇ ਜਿਹੜੇ, ਛਾਵਾਂ ਕਰਦੇ ਆਏ ਸੀ,

ਰੁੱਖ, ਤਣੇ ਤੋਂ ਜੜ੍ਹ ਤੀਕਰ, ਕਮਅਕਲਾਂ ਨੇ ਝੁਲਸਾ ਦਿੱਤੇ l

ਪਰਕਿਰਤੀ ਦਾ ਘਾਣ ਕਰਦਿਆਂ, ਭੁੱਲੜ ਕੁਛ ਕਿਰਸਾਨਾਂ ਨੇ,

ਸਾਰੇ ਹੀ ਕਿਰਸਾਨ ਬੁਰੇ ਨੇ, ਭਰਮ ਦਿਲਾਂ ਵਿਚ ਪਾ ਦਿੱਤੇ l

ਦਿਲ ਕਰਦਾ ਹੈ ਧਾਹਾਂ ਮਾਰਾਂ, ਗਲ ਲਗ ਸੜਿਆਂ ਰੁੱਖਾਂ ਦੇ,

'ਸ਼ਿਵ' ਦੇ ਮਾਂ, ਪੁੱਤਰ ਤੇ ਭੈਣਾਂ, ਬੰਦੇ ਨੇ ਝੁਲਸਾ ਦਿੱਤੇ l 

ਬਾਬੇ ਨਾਨਕ ਨੂੰ ਮੰਨੇਂ, ਪਰ, "ਮਾਤਾ ਧਰਤ" ਨਹੀਂ ਮੰਨੇਂ,

ਇੰਝ ਉਦ੍ਹੇ ਵਾਰਿਸ ਦੇ ਸਾਰੇ, ਦਾਵੇ ਤੂੰ ਝੁਠਲਾ ਦਿੱਤੇ l

ਪਾਪਾਂ ਦਾ ਇਹ ਕੂੜ ਖ਼ਿਲਾਰਾ, ਹੋਣਾ 'ਤਰਨ' ਸਮੇਟ ਨਹੀਂ,

ਹੱਥ ਕਰਾਰੇ ਜਿਸ ਦਿਨ ਤੈਨੂੰ, ਕੁਦਰਤ ਨੇ ਦਿਖਲਾ ਦਿੱਤੇ l

            ਤਰਨਜੀਤ ਸਿੰਘ

            9815404075