ਮੇਰੀ ਔਕਾਤ ਤੋਂ
ਕਿਤੇ ਵੱਡਾ ਹੈ
ਕਿਰਤੀਆਂ ਦਾ ਕੱਦ ...
ਇਕ ਬਾਪ ਦਾ ਪਸੀਨਾ
ਮਾਂ ਦੇ ਹੱਥਾਂ ਦੇ ਅੱਟਣਾਂ ਦਾ ਆਕਾਰ ...
ਖੇਡਾਂ ਨੂੰ ਤਿਆਗ
ਖੇਤਾਂ 'ਚ
ਸਿੱਟੇ ਚੁਗਦਾ ਜਵਾਕਾਂ ਦਾ ਬਚਪਨ ...
ਛੋਟੇ ਵੀਰ ਦੀ ਪੜਾਈ
ਮਾਂ ਦੀ ਦਵਾਈ
ਤੇ ਬੁੱਢੇ ਬਾਪ ਦੇ ਸਿਰ
ਕਰਜ਼ਾ ਚੜ੍ਹਨ ਦੇ ਡਰੋਂ
ਦੁਹਾਜੂ ਬੁੱਢੇ ਨਾਲ
ਵਿਆਹ ਲਈ ਹਾਮੀ ਭਰਦੀ
ਧੀ ਦਾ ਫਿਕਰ ...
ਮੇਰੇ ਹੌਂਸਲੇ ਤੋਂ ਕਿਤੇ ਸ਼ਕਤੀਸ਼ਾਲੀ ਹੈ
ਹਨੇਰਿਆਂ ਨੂੰ ਅੱਖਾਂ ਕੱਢ ਕੇ
ਡਰਾਉਂਦੇ
ਜੁਗਨੂੰਆਂ ਦਾ ਕਲੇਜਾ ...
ਕੀੜੀਆਂ ਦੀ ਨਿਰੰਤਰ ਚਾਲ ...
ਲੱਕੜਹਾਰਿਆਂ ਨੂੰ ਵੀ ਛਾਂ ਦਿੰਦੇ
ਰੁੱਖਾਂ ਦੇ ਜ਼ੇਰੇ ...
ਹਵਾ ਦੀ ਧੌਣ 'ਤੇ ਗੋਡਾ ਰੱਖ ਕੇ ਉੱਡਦੇ
ਰੇਤ ਦੇ ਕਣ ...
ਮੇਰੀ ਔਕਾਤ ਤੋਂ
ਬਹੁਤ ਵੱਡੇ ਨੇ ...
No comments:
Post a Comment