ਇਹ ਦਿਲ ਦੀ ਪੀੜ ਦਾ ਹੀ ਤਾਂ ਉਬਾਲ਼ ਹੁੰਦਾ ਹੈ ,
ਕਿ ਬੂੰਦ ਬੂੰਦ ਲਹੂ ਸ਼ਿਅਰਾਂ 'ਚ ਢਾਲ਼ ਹੁੰਦਾ ਹੈ ।
``
ਹਰੇਕ ਲਫ਼ਜ਼ ਦੀ ਕੀਮਤ ਪਵੇ ਅਦਾ ਕਰਨੀ ,
ਲਹੂ ਨਿਚੋੜਕੇ ਇਹ ਸ਼ੌਕ ਪਾਲ਼ ਹੁੰਦਾ ਹੈ ।
ਜਨਾਬ ਤੀਰ ਇਹ ਨੈਣਾਂ ਦੇ ਜਾਨ ਕੱਢਦੇ ਨੇ ,
ਕਿ ਇਸ ਗਰੀਬ ਤੋਂ ਨਾ ਦਿਲ ਸੰਭਾਲ਼ ਹੁੰਦਾ ਹੈ ।
ਨਦਾਨ ਜਾ ਫਸੇ ਅਣਭੋਲ਼ ਨਾ ਪਤਾ ਚਲਦਾ ,
ਬੜਾ ਮਹੀਨ ਇਹ ਮੰਡੀ ਦਾ ਜ਼ਾਲ਼ ਹੁੰਦਾ ਹੈ ।
ਨ ਬਹਿਕਦੇ ਨੇ ਕਦਮ ਤੁਰਨ ਇਹ ਸਹੀ ਰਾਹ ਤੇ ,
ਸਦਾ ਜ਼ਮੀਰ ਦਾ ਡਰ ਨਾਲ਼ ਨਾਲ਼ ਹੁੰਦਾ ਹੈ ।
ਹਰੇਕ ਭੇਤ ਇਹ ਕੁਦਰਤ ਦਾ ਜਾਣਨਾ ਚਾਹੇ ,
ਕਿ ਦਿਲ ਤਾਂ ਜਿਦ ਪਿਆ ਬੱਚਾ ਨ ਟਾਲ਼ ਹੁੰਦਾ ਹੈ ।
ਪਛਾਣ ਕ੍ਰਿਸ਼ਨ ਜੇ ਤੇਰੀ ਤਾਂ ਹੈ ਉਹ ਮਾਂ ਬੋਲੀ ,
ਜ਼ੁਬਾਨ ਤੋਂ ਮੁਕਰ ਜਾਣਾ ਤਾਂ ਗਾਲ਼ ਹੁੰਦਾ ਹੈ ।
No comments:
Post a Comment