ਭਾਵੇਂ ਕਰਦੇ ਆਪਣੇਂ ਮੂੰਹ ਤੇ ਐਡੇ ਵੱਡੇ ਪਰਦੇ ਲੋਕ ।
ਮੈਂ ਜਰਾ ਕੁ ਹੀ ਚੁੱਪ ਵੱਟੀ ਐਨਾ ਵੀ ਨਾ ਜਰਦੇ ਲੋਕ ।
ਕੱਲ੍ਹ ਜਿਹੜੇ ਪਿੱਠ ਦੇ ਕੇ ਆਏ ਤੱਤੇ ਰਣ ਦੇ ਵਿੱਚੋਂ ਸੀ ;
ਅਸਾਂ ਨੇ ਕਈ ਲੜਾਈਆਂ ਜਿੱਤੀਆਂ ਗੱਲਾਂ ਨੇ ਇੰਜ ਕਰਦੇ ਲੋਕ ।
ਅੱਧ ਵਿਚਕਾਰੋਂ ਜਾਂ ਮੈਂ ਮੁੜਿਆ ਤਾਹਨੇਂ ਮੈਂਨੂੰ ਦੇਣ ਲੱਗੇ ;
ਵਕਤ ਪੈਣ ਤੇ ਪਤਾ ਇਹ ਲੱਗਿਆ ਠਿਲ੍ਹਣ ਤੋਂ ਹੀ ਡਰਦੇ ਲੋਕ ।
ਰਾਜ਼ ਦੀਆਂ ਕਈ ਗੱਲਾਂ ਦੱਸਕੇ ਅੱਜ ਪਛਤਾਉਣਾ ਪੈ ਗਿਆ ;
ਦੱਸਣ ਲੱਗਿਆਂ ਮੈਂ ਸੀ ਸਮਝਿਆ ਸੱਭੇ ਨੇ ਇਹ ਘਰਦੇ ਲੋਕ ।
ਪੋਹ ਮਾਘ ਦੀਆਂ ਰਾਤਾਂ ਅੰਦਰ ਸਾਥ ਇਹਨਾ ਨੇ ਦੇਣਾ ਕੀ ;
ਸਾਉਣ ਮਹੀਨੇ ਮੀਂਹਾਂ ਅੰਦਰ ਜੋ ਰਹਿੰਦੇ ਨੇ ਠਰਦੇ ਲੋਕ ।
ਦਾਦੀ ਮਾਂ ਸੀ ਬਾਤ ਸੁਣਾਉਂਦੀ ਮਾਇਆਧਾਰੀ ਨਾਗਾਂ ਦੀ ;
ਮਾਇਆ ਦੇ ਵਹਿਣਾਂ ਦੇ ਅੰਦਰ ਸਾਰੇ ਹੀ ਹੁਣ ਹੜ੍ਹਦੇ ਲੋਕ ।
ਪਾਣੀ ਪਾਣੀ ਕਰਦੇ ਏਥੇ ਕਈ ਮੁਸਾਫਿਰ ਮਰ ਗਏ ਨੇ ;
ਮੋਇਆਂ ਦੇ ਮੂੰਹਾਂ ਦੇ ਅੰਦਰ ਗੰਗਾਜਲ ਨੇ ਧਰਦੇ ਲੋਕ ।
No comments:
Post a Comment