ਗ਼ਜ਼ਲ - ਮਨਜੀਤ ਕੌਰ ਮੀਸ਼ਾ

•ਕਿਸੇ ਰੋਂਦੇ ਦੇ ਹੰਝੂ ਪੀ ਕਿਸੇ ਦਾ ਗਮ ਵੰਡਾਉਂਦਾ ਜਾ,

ਲੱਗੇਗੀ ਜ਼ਿੰਦਗੀ ਸੋਹਣੀ ਕਿਸੇ ਖਾਤਿਰ ਹੰਡਾਉਂਦਾ ਜਾ l

•ਤੇਰੇ ਹਿੱਸੇ ਦੀਆਂ ਖੁਸ਼ੀਆਂ ਕਿਸੇ ਦੇ ਕੰਮ ਆ ਜਾਵਣ,

ਤੇਰਾ ਦਾਮਨ ਰਹੂ ਭਰਿਆ ਤੂੰ ਹੋਰਾਂ ਨੂੰ ਲੁਟਾਉਂਦਾ ਜਾ l

• ਕਦੇ ਤਾਂ ਦਿਲ ਓਦਾ ਪਿਘਲੂ ਤੇਰੇ ਦਰਦਾਂ ਦੀ ਗਲ ਸੁਣ ਕੇ,

ਉਹ ਪੱਥਰ ਹੋ ਗਿਆ ਭਾਵੇਂ ਓਨੂੰ ਫਿਰ ਵੀ ਮਨਾਉਂਦਾ ਜਾ l

•ਉਹ ਆਵੇ ਜਾਂ ਨਾ ਫਿਰ ਆਵੇ ਕਸਕ ਅੱਖਾਂ ਦੀ ਨਾ ਮੁੱਕੇ,

ਓਦੀ ਖਾਤਿਰ ਤੂੰ ਰਾਹਾਂ ਵਿਚ ਸਦਾ ਹੀ ਫੁੱਲ ਵਿਛਾਉਂਦਾ ਜਾ l

•ਤੇਰੀ ਕਿਸਮਤ ' ਚ ਜੋ ਹੈਗਾ ਉਹ ਤੈਨੂੰ ਮਿਲ ਕੇ ਹੀ ਰਹਿਣਾ,

ਕਿਸੇ ਦੇ ਮਹਿਲ ਨੂੰ ਤੱਕ ਕੇ ਨਾ ਆਪਣੀ ਝੁੱਗੀ ਢਾਹੁੰਦਾ ਜਾ l

•ਜੋ ਤੇਰਾ ਸੋਚਦੇ ਮਾੜਾ ਓਨਾ ਦਾ ਵੀ ਭਲਾ ਮੰਗ ਲੈ,

ਨਾ ਰੱਖ ਸੀਨੇ ਤੇ ਕੋਈ ਬੋਝ ਹਰ ਗੱਲ ਨੂੰ ਭੁਲਾਉਂਦਾ ਜਾ l

•ਕਦੀ ਤਾਂ ਉਸ ਦੀ ਟੁੱਟੇਗੀ ਜੋ ਹੈ ਬੇਕਾਰ ਦੀ ਆਕੜ,

ਤੂੰ ਆਪਣੇ ਵੱਲੋਂ ਹਰ ਰਿਸ਼ਤੇ ਨੂੰ ਜੀਅ ਲਾ ਕੇ ਨਿਭਾਉਂਦਾ ਜਾ l

•ਨਾ ਕਰ ਪ੍ਰਵਾਹ ਦੁਨੀਆਂ ਦੀ ਜੋ ਕਹਿੰਦੇ ਨੇ ਬੁਰਾ ਤੈਨੂੰ,

ਤੂੰ ਸੁਣ ਕੇ ਅਣਸੁਣਾ ਕਰਦੇ ਨਾ ਗੱਲ ਦਿਲ ਉੱਤੇ ਲਾਉਂਦਾ ਜਾ l

•ਭਲਾਈ ਕਰਨ ਲਈ ਮਿਲਿਆ ਇਹ ਜੀਵਨ ਸਾਰਾ ਹੀ ਮਨਜੀਤ,

 ਵਿਗੜ ਜਾਣੇ ਨੇ ਕੰਮ ਖੁਦ ਦੇ ਨਾ ਹੋਰਾਂ ਦੇ ਰੁਕਾਉਂਦਾ ਜਾ l